XVII жарны “Элдэв эрдэнэт” хэмээх Модон могой жилийн хаврын тэргүүн сарын шинийн нэгэн хаяа дэрлэн ойртон иржээ.
Маргааш битүүний өдөр. Айл бүхэн шинэ сайхан бүхэнд бэлдэж, хороо, гэрээ цэвэрлэж, зургаан настнаас наян нас хол давсан хэн бүхэн л орой болохыг догдлон хүлээн суугаа.
Хүүхэд насанд хамгийн гоё баярын нэг нь яах аргагүй цагаан сар байдаг.
Тиймээс бид өнөөдөр зургаан настангуудаас “Цагаан сарын баярыг хэрхэн тэмдэглэдэг, цагаан сарын хамгийн гоё нь юу болох” талаар Улсын тэргүүний 24 дүгээр сургуулийн нэгдүгээр анги буюу 1Г, 1В ангийн сурагчидтай ярилцлаа.
Биднийг ирэх үед тус сургуульд “Цагаан сарын баяр”-ыг таниулах үйл ажиллагаа болж байсан бөгөөд энд буй хэн бүр Монгол дээл, хувцсаараа гоёсон байлаа.
Цагаан сарын баярын хамгийн гоё нь бууз идэж, өвөө, эмээтэйгээ золгож, айл хэсч бэлэг цуглуулах. Хүмүүс надад ном, шоколад, мөнгө бэлэглээсэй гэж хүсч байна. Бас жимс бэлэглэвэл би их баярлана. Хамаатнуудтайгаа уулзах бас хамгийн гоё байдаг, Хөдөө өвөө эмээрүүгээ явж золголт хийнэ гэж ярих өхөөрдөм хүүхдүүд зөрүүлээд надаас аав ээжтэйгээ эхлээд золгох билүү эмээ өвөөтэйгөө золгох билүү ч гэх өхөөрдөм асуултыг асууж байлаа.
Мөн энэ өдөр тус сургуулийнхан сар шинийг угтсан сургуулийн аварга шалгаруулах Үндэсний бөхийн барилдааныг зохион байгуулж, хүүхдүүд уран мэхийг уралдуулан барилдаж, үзүүр түрүү, шөвгийн дөрвөн бөхийг шалгууруулж, тавгийн идээ, алт, мөнгө, хүрэл медаль өргөмжлөлөөр шагнуулсан бөгөөд бага насны ангилалд 1г ангийн сурагч М.Азжаргал түрүүлсэн юм.
