УИХ-ын гишүүн, Боомтын сайд Б.Тулгыг Ерөнхий сайд Л.Оюун-Эрдэнийн захирамжаар Тавантолгой бүлэг ордод хэний шийдвэрээр хэнд ямар лиценз өгснийг шалгаж,нягтлах ажлын хэсэгт оруулсан. Гэвч тэрээр өнгөрсөн УИХ-ын сонгуулиар шалгах гэж байгаа MSC группээсээ 100 сая төгрөгийн хандив авчээ.
Тэрээр Тавантолгой бүлэг ордын нэг болох Ухаа худагийг авснаараа өнөөдөр ид хэрүүлийн бай болоод буй “Энержи ресурс”-ээс 30 сая, MSC-ийн өөр нэг охин компани “Юнайтед пауэр” гэх компаниас 30 сая,”Ухаа худаг ус хангамж”-аас 10 сая, “Тавантолгой цахилгаан станц ус хангамж”-аас 30 сая гээд нийтдээ 100 сая төгрөгийн хандив авчээ.
Боомтын сайд Б.Тулга үүнийгээ өөрөө ч хүлээн зөвшөөрч, “Ерөнхий сайд чиглэл өгөөд ажилла гэж байгаа бол миний хувьд Засгийн газрын гишүүний хувьд ажиллахад бэлэн. Ажлын хэсгийн бүрэлдэхүүнд орж ажиллалаа гээд ямар нэгэн ашиг сонирхлын зөрчил байхгүй учраас аливаа шийдвэрт нөлөөлөл үзүүлэх зүйл огт байхгүй гэж хэлмээр байна” хэмээн ярьжээ.
Өөрөөр хэлбэл,тэрээр хандив авч сонгуульд орсон компаниа шалгах ажлын хэсэгт орсноо ашиг сонирхлын зөрчилгүй хэмээн хээвнэг хэлэв.
Ашиг сонирхлын зөрчил” гэдгийг нийтийн албан тушаалтан албаны чиг үүргээ хэрэгжүүлэх үед түүний хувийн ашиг сонирхол нийтийн ашиг сонирхолтой зөрчилдөх болон албан үүргээ тэгш, шударгаар хэрэгжүүлэхэд харшаар нөлөөлж болохуйц нөхцөл байдал хэмээн тодорхойлсон. өөрөөр хэлбэл, төрийн албан хаагчийн хувьд нэг талаас олон нийтийн эрх ашигт үйлчлэх үүрэг, нөгөө талаас хувийн сонирхол хоорондоо зөрчилдөхийг ашиг сонирхлын зөрчил хэмээн ойлгож болно хэмээн тодорхойлсон байдаг.
Энэ тодорхойлолтоос харвал хувийн аж ахуйн нэгжээс их хэмжээний хандив авчихаад ашиг сонирхлын зөрчил биш гэж үзэн, тэгээд тэр аж ахуйн нэгжээ шалгана гэдэг санаанд багтамгүй зөрчил юм.
Тиймээс ийм улайм цайм хандлагатай Б.Тулгыг ажлын хэсгээс гаргана уу хэмээн Ерөнхий сайдаас хүсмээр байна.
