Тээвэр хөгжлийн банк 2026 оны II улирлын санхүүгийн тайлангаа харилцагчид, хамтран ажиллагч байгууллагууд, хувьцаа эзэмшигчид болон олон нийтэд нээлттэй танилцуулж байна.
2026 оны 6 дугаар сарын 30-ны байдлаарх Тээвэр хөгжлийн банкны бусдаас татан төвлөрүүлсэн харилцах, хадгаламжийн үлдэгдэл өмнөх оны мөн үетэй харьцуулахад 73 хувиар өсөж, 1.4 их наяд төгрөгт хүрсэн байна. Нийт хөрөнгө мөн хугацаанд 72 хувиар өсөж, 2.2 их наяд төгрөгт хүрчээ. Тайлант хугацаанд активын өгөөж болон зардлын үр ашгийг ханган ажилласны үр дүнд 5.3 тэрбум төгрөгийн ашигтай ажилласан байна.
Мөн банк нь зохицуулагч байгууллагаас тогтоосон зохистой харьцааны шалгуур үзүүлэлтүүдийг бүрэн ханган ажилласан бөгөөд төлбөр түргэн гүйцэтгэх чадварын харьцаа үзүүлэлт 39.8 хувь, өөрийн хөрөнгийн зохистой харьцааны үзүүлэлт 18.3 хувьд хүрсэн буюу шалгуур үзүүлэлтийг 6.3 хувиар давуулан биелүүлсэн нь банкны салбарт тэргүүлэх үзүүлэлтэд тооцогдож байна.
2026 оны 2 дугаар улирлын онцлох үйл явдлаас дурдвал:
- Монгол Улсын Засгийн газар, МҮХАҮТ-аас 24 дэх жилдээ зохион байгуулагдсан “ТОП-100” аж ахуйн нэгжийн нэгээр дахин шалгарлаа.
- Тээвэр хөгжлийн банк нь хувийн банкны үйлчилгээний чанар, чадавхыг олон улсын түвшинд хүргэх зорилгын хүрээнд Монголын Banking and Finance Academy (BFA) болон European Financial Planning Association (EFPA)-тай хамтран “Certified Private Banker” хөтөлбөрийг амжилттай хэрэгжүүлж, тус хөтөлбөрийг төгссөн хувийн банкирууд олон улсад хүлээн зөвшөөрөгдсөн “Certified Private Banker” сертификатаа гардан авлаа.
- Монгол Улсын хөгжлийн төлөвлөгөөнд багтсан дэд бүтцийн төслийг дэмжих бондын эхний шатны зорилтот санхүүжилтийг амжилттай татан төвлөрүүлсний үргэлжлэл болгон, “Экспортын зам-II” бондын үндсэн андеррайтераар ажиллаж эхэллээ.
- Банкны дижитал шилжилтийг эрчимжүүлэн eKYC (цахим танилт, баталгаажуулалт)-ийн системийг нэвтрүүлж, харилцагчийг зайнаас таньж баталгаажуулах үйл явцыг олон улсын жишигт нийцүүлэн хэрэгжүүллээ.
- Дэлхийн 170 гаруй улсад төлбөр тооцоогоо гүйцэтгэх боломжтой орчин үеийн минимал загвартай олон улсын Юнионпэй “Splendor Plus” картыг зах зээлд нэвтрүүллээ.
- Монгол Улсад анх удаа зохион байгуулагдах IMC Mongolia 2026 олон улсын математикийн олимпиадыг ерөнхий ивээн тэтгэгчээр дэмжин, хамтын ажиллагааны гэрээ байгууллаа.
Түүнчлэн банк нь үйл ажиллагааны чанар, эрсдэлийн удирдлага, харилцагчийн үйлчилгээний стандартыг тасралтгүй сайжруулсны үр дүнд үйлчилгээний хүртээмж, үр ашиг болон өрсөлдөх чадвараа нэмэгдүүлж, урт хугацааны санхүүгийн тогтвортой байдал, харилцагч болон түншүүдийнхээ итгэлийг улам бэхжүүллээ.
