Боловсролын сайд П.Наранбаяр сурагчдын амралтын хуваарьт өөрчлөлт оруулж байгаа талаар мэдээлэл өглөө.
Тэрбээр “Боловсролын яамнаас 2025-2026 оны хичээлийн жилийн шинэ бүтцийг гаргаснаа танилцуулж байна.
2024-2025 оны хичээлийн жил бол гурван улирлын бүтэцтэй явсан. Үүний хүрээнд нэгдүгээр сард хүүхдүүд таван долоо хоног, бага сургууль нэг сар амарсан. Энэ нь олон жилийн томуу, ханиадны дэгдэлтийг тооцсон.
Тиймээс 2025-2026 оны хичээлийн жил гурван улирлын бүтэцтэй явна. Амралтын нэг долоо хоног сунгаж байгаа.
Улмаар арванхоёрдугаар сарын 15-ны өдрөөс бага сургууль амарч, нэгдүгээр сарын 26-ны даваа гарагт хичээл эхэлнэ. Ингээд нийт зургаан долоо хоног амрах нөхцөл бий болгож байна. Нэгдүгээрт, түгжрэлийг бууруулна, хоёрдугаарт хүйтний ид үед хүүхдүүдийн ханиад томууны дэгдэлт буурна. Дунд, ахлах ангийнхан арванхоёрдугаар сарын 22-ноос амарна. Гэхдээ ахлах ангийнхан нэг долоо хоног цахимаар хичээллэнэ. Харин зургаадугаар сард нэг долоо хоног сунаж хичээллэнэ. Энэ нь зургаадугаар сарын 08-12-ны хооронд тохионо. Зургаадугаар сарын 15-наас зуны амралт эхлэнэ.” гэв.
Тухайлбал,
Бага анги:
- 12 дугаар сарын 15-ны өдрөөс амарч нэгдүгээр сарын 26-ны даваа гарагт хичээлдээ орно.
Дунд анги:
- 12 дугаар сарын 22-ны өдрөөс амарч нэгдүгээр сарын 26-ны даваа гарагт хичээлдээ орно.
Ахлах анги:
- 12 дугаар сарын 22-ны өдрөөс цахимаар 7 хоног хичээллэж, үндсэн амралт арванхоёрдугаар сарын 29-ний өдрөөс эхэлнэ. Нэгдүгээр сарын 26-ны даваа гарагт хичээлдээ орно.
Харин хөдөө, орон нутгийн сурагчид 12 дугаар сард нийслэлийн сурагчдаас 1 долоо хоногоор бага хугацаагаар амарч, мал, төллөлтийн үеэр нэг долоо хоногоор илүү амрах зохицуулалт хийжээ.
