Зуны сарууд дундаа орж, дэлгэр цаг ирсэн ч махны үнэ хавраас хойш төдийлөн буурсангүй.
Энэ талаар салбарын яам нь ямар байр суурьтай байгааг өнөөдөр тодрууллаа.
Ингэхэд Хүнс, хөдөө аж ахуй, хөнгөн үйлдвэрийн сайд Ц.Идэрбат “Махны үнэд хэн хүнгүй анхаарч байна. Инфляцад өндөр нөлөөтэй байдаг тул Засгийн газрын тогтоолуудаар төв суурин газрын махны хэрэгцээнд аймаг, нийслэл нь өөрсдөө нөөцөө бүрдүүл гэсэн албан даалгавар өгсөн. Аймгууд нөөцөө бүрдүүлэх ажилдаа орсон бол нийслэл нэлээд бодитой ажиллаж байна. Ажлын хэсгээ байгуулаад худалдан авалтаа ямар хэлбэрээр явуулах вэ гэхчлэн өчигдөрхөн хурлаа хийсэн байсан. Урьд өмнөхөөс илүү их хэмжээгээр бэлдэх зорилготой байгаа.
Хөдөөгийн малчид малаа хэдээр үнэлэхийг би хэлж мэдэхгүй. Энэ бол тэр хүний өмч.
Дэнжийн 1,000 дээр үнийн гурван шат байна. Хөдөөнөөс мах ачаад ирсэн гурван машин хүн авахгүй байна гээд хаалгаа хаасан. Бөөний үнэ нь хонь 19 мянга, үхрийн мах 21 мянга гэж байгаа. Дорнод аймагт өнөөдөр надад бичлэг ирүүлэхэд мал төхөөрөх үйлдвэр маш их адуу, үхэр, хонь байна. Төхөөрөөд явуулъя гэхээр энд борлуулалт алга.
Мөн зарим аймагт тогтоосон хорио цээрийн дэглэмийн талаар наймдугаар сарын 5-ны Засгийн газрын хуралдаанаар оруулна. Хорио тавигдахаар баруун талаас мах чөлөөтэй орж ирнэ” гэлээ.
