Амжилт Кибер сургуулийн салбарууд болон Цонжин Кибер Боардинг сургууль нь нийт 3,000 гаруй сурагчийг хамарсан боловсролын томоохон систем болон өргөжөөд байна.
Олон сурагч, олон салбар, шинэ тогтолцоог зэрэг хөгжүүлэх үйл явцад асуулт, эргэлзээ, шүүмжлэл дагалдах нь бий. Харин сургалтын үр дүнг сурагчдын гаргасан амжилт, бүтээсэн төсөл, хүртсэн тэтгэлэг, дараагийн шатандаа хэрхэн бэлтгэгдэж байгаагаар нь хэмжих боломжтой.
Монголын анхны IT суурьтай боардинг сургуулийг бүтээх Цонжин Кибер Боардинг сургуулийн аялал 2022 онд эхэлсэн. Анх 17 багш, 69 сурагчтайгаар эхэлж байсан тус сургууль жилээс жилд хүрээгээ тэлж, сургалтын хөтөлбөр, багшлах боловсон хүчин, дотуур байр, хөгжүүлэх орчноо үе шаттайгаар өргөжүүлсээр ирлээ.
Шинэ санаа, шинэ систем, шинэ сургалтын орчин бүр өөрийн гэсэн сорилт, эргэлзээ, хүлээлттэй тулгардаг. Боардинг сургуулийн хувьд хүүхдийн хичээлээс гадна амьдрах орчин, хооллолт, аюулгүй байдал, өдөр тутмын хэмнэл, бие даах чадвар, сэтгэл зүйн дэмжлэгийг нэг тогтолцоонд уялдуулах шаардлагатай байдаг.
Энэ бүхнийг эцэг эхчүүдийн итгэл, сурагчдын хичээл зүтгэл, багш ажилтнуудын хамтын хөдөлмөрөөр бүтээж ирсэн Цонжин Кибер Боардинг сургууль өнөөдөр хөгжлийнхөө дараагийн томоохон үеийн босгон дээр ирээд байна.
Шинэ кампусын барилгын ажил дуусах шатандаа орлоо
Хичээлийн шинэ жил эхлэхэд цөөн хоног үлдэж буй энэ үед сургуулийн кампусын өргөтгөл, шинэ барилгын дотоод тохижилт, анги танхимын бэлтгэл ажлууд эцсийн шатандаа үргэлжилж байна.
Шинээр баригдаж буй 5,000 м.кв талбай бүхий таван давхар барилгад сургалтын болон хөгжүүлэх зориулалтын танхимууд, дунд, ахлах ангийн сурагчдын дотуур байр, өдөр тутмын хэрэгцээг хангах цогц орчныг бүрдүүлж байна.
Шинэ барилга ашиглалтад орсноор сурагчдын суралцах, амьдрах, амрах, төсөл хэрэгжүүлэх, ур чадвараа хөгжүүлэх орчны хүртээмж нэмэгдэж, кампусын нэгдсэн зохион байгуулалт шинэ түвшинд хүрэх юм.
Бага ангиас ахлах анги хүртэлх цогц бүтэц бүрдэнэ
Ирэх хичээлийн жилээс Цонжин Кибер Боардинг сургууль бага ангийн сурагчдаа хүлээн авч, 1–12 дугаар ангийн цогц бүтэцтэйгээр үйл ажиллагаагаа явуулна.
Бага ангиас нь суурь эрдэм, англи болон хятад хэл, математик, технологийн сэтгэлгээ, бүтээлч чадвар, өдөр тутмын зөв дадал, бие даах чадварыг үе шаттай хөгжүүлнэ.
Дунд ангид программчлал, график дизайн, шинжлэх ухаан, төсөлт сургалттай уялдуулан гүнзгийрүүлж, ахлах ангид олон улсын шалгалт, мэргэжил сонголт, гадаадын их сургуулийн элсэлт, тэтгэлгийн бэлтгэл рүү шилжүүлэх нэгдсэн замналыг хэрэгжүүлнэ.
Ингэснээр сурагчийн бага ангиас эхэлсэн хөгжлийг төгсөх хүртэл нь нэг системээр чиглүүлж, мэдлэгийг чадвар, чадварыг бодит үр дүн болгон хөгжүүлэх боломж бүрдэж байна.
Cambridge-ийн хөтөлбөрийг хэрэгжүүлэх бэлтгэл хангагдаж байна
Цонжин Кибер Боардинг сургууль science суурьтай Cambridge-ийн цогц хөтөлбөрийг хэрэгжүүлэх эрхээ баталгаажуулж, сургалтын агуулга, үнэлгээ, шалгалтын тогтолцоогоо олон улсын жишигтэй уялдуулан шинэчилж байна.
Cambridge-ийн хөтөлбөрөөр сурагчид хичээлийн агуулгыг цээжлэхээс илүүтэй ойлгох, асуулт дэвшүүлэх, туршилт хийх, мэдээлэлд дүн шинжилгээ хийх, сурсан мэдлэгээ бодит нөхцөлд ашиглах арга барилд суралцана.
Уг хөтөлбөрийг математик, англи болон хятад хэл, программчлал, график дизайн, төсөлт сургалттай уялдуулснаар сурагчдын олон улсын шалгалт болон дараагийн шатны боловсролын суурь илүү системтэй тавигдах юм.
Олон улсын олимпиадын амжилтаар мэдлэгээ баталлаа
Цонжин Кибер Боардинг сургуулийн сурагчид IMOCSEA, AIMO, ADEPT, SEAMO, Кенгуру зэрэг олон улсын олимпиад, уралдаанд тогтмол оролцож, мэдлэг чадвараа сорьсоор байна.
Зөвхөн нэг хичээлийн жилийн хугацаанд IMOCSEA, AIMO, ADEPT олимпиадаас 6 алт, 10 мөнгө, 9 хүрэл медаль, 10 тусгай байр, нэг онцгой амжилтын шагнал хүртсэн байна.
Мөн Кенгуру олон улсын математикийн олимпиадад 67 сурагч оролцсоноос 16 сурагч I, II, III зэргийн шагналын эзэн болжээ.
Эдгээр амжилтын ард сурагчдын тууштай бэлтгэл, асуудлыг задлан шинжлэх чадвар, багш нарын өдөр тутмын чиглүүлэг, сургалтын системтэй төлөвлөлт бий.
120 гаруй инновацын төслийг хэрэгжүүлжээ
Цонжин Кибер Боардинг сургуулийн сургалтын үндсэн чиглэлүүдийн нэг нь хичээлээр олж авсан мэдлэгийг бодит төсөл, бүтээгдэхүүнтэй холбох юм.
2023 оноос хойш сурагчид чиглүүлэгч багш нарын дэмжлэгтэйгээр 120 гаруй инновацын төсөл хэрэгжүүлсэн байна. Тэд программчлал, график дизайн, гадаад хэл, байгалийн ухаан, маркетингийн мэдлэгээ нэгтгэн асуудлыг тодорхойлж, шийдэл боловсруулж, бүтээгдэхүүний эх загвар бүтээн, хэрэглэгчдэд танилцуулах хүртэлх үйл явцад оролцжээ.
Сурагчдын хэрэгжүүлсэн төслүүдийн хүрээнд 60 хүртэлх сая төгрөгийн хөрөнгө оруулалт татаж, зарим бүтээгдэхүүн бодит хэрэглээнд нэвтэрч эхэлсэн байна.
Ийнхүү сурагчид технологийг зөвхөн хэрэглэгчийн түвшинд ашиглах бус, өөрийн санааг шийдэл, бүтээгдэхүүн болгон хөгжүүлэх бүтээгчийн туршлагыг сургуулийн орчноосоо хуримтлуулж байна.
Төгсөгчдийн тэтгэлгийн хэмжээ 37 тэрбум төгрөгт хүрэв
Цонжин Кибер Боардинг сургуулийн төгсөгчид олон улсын хэлний шалгалт, мэргэжил сонголт, их сургуулийн элсэлт, эсээ болон тэтгэлгийн материал бүрдүүлэлтийн чиглэлээр үе шаттай бэлтгэгддэг.
2023 онд 10 сурагч гадаадын их, дээд сургуулиудад нийт 5 тэрбум төгрөгийн тэтгэлэгтэй суралцах боломжтой болсон бол 2024 онд 21 сурагч 15 тэрбум төгрөгийн тэтгэлэг хүртсэн.
Харин 2025 онд 16 сурагчийн хүртсэн тэтгэлгийн хэмжээ 17 тэрбум төгрөгт хүрч, сургуулийн төгсөгчдийн нийт авсан тэтгэлгийн дүн 37 тэрбум төгрөг болсон байна.
Төгсөгчид АНУ, Унгар, Хятад, Канад, Хонконг, Япон, Итали, БНСУ зэрэг улсын их сургуулиудад өөрсдийн сонгосон мэргэжлээр суралцах замналаа үргэлжлүүлжээ.
Энэ үр дүнгийн ард сурагчдын олон жилийн хөдөлмөр, багш нарын чиглүүлэг, эцэг эхчүүдийн итгэл, хэл, технологи, математик, төсөлт сургалтыг уялдуулсан нэгдсэн тогтолцоо бий.
Шинэ хичээлийн жил, хөгжлийн шинэ үе
Одоо кампусын шинэ барилга сурагчдаа хүлээн авахад ойртож, анги танхимын тохижилт, сургалтын хөтөлбөр, багш ажилтны бэлтгэл, дотуур байрны зохион байгуулалт зэрэг шинэ хичээлийн жилийн ажлууд дуусах шатандаа орлоо.
Бага ангийн шинэ бүтэц, 1–12 дугаар ангийн залгамж холбоотой сургалт, Cambridge-ийн хөтөлбөр, технологийн гүнзгийрүүлсэн чиглэл, олон улсын шалгалтын бэлтгэл, төсөлт сургалт, өргөжсөн кампус нэг дор нэгдэж, Цонжин Кибер Боардинг сургуулийн хөгжлийн шинэ үе эхэлж байна.
Энэхүү замналын эхлэлээс өнөөдрийг хүртэл итгэж, дэмжиж, хамтдаа бүтээлцсэн нийт эцэг эхчүүд, сурагчид, төгсөгчид, багш ажилтнууд болон хамт олондоо чин сэтгэлийн талархал илэрхийлье.
Мэдье. Хэрэглэе. Үр шимийг нь хүртье.
