Баасан гарагийн үүрээр Санкт Петербург хот дахь Wildberries компанийн агуулах Украины нисгэгчгүй онгоцны цохилтод өртсөний улмаас томоохон гал түймэр гарсан байна.
Ингэснээр долоо хоног хүрэхгүй хугацааны дотор Оросын хамгийн том онлайн худалдааны компани гурав дахь удаагаа Украины халдлагад өртөж байгаа юм.
Тус компанийн үүсгэн байгуулагч, Оросын хамгийн баян эмэгтэй Татьяна Ким үүнээс гадна эзлэгдсэн Крым дэх Wildberries компанийн байгууламжууд шатсан тухай мэдээлжээ.
Тэрбээр компанийн ажилчдаас шархадсан хүн байхгүйг баталсан бол Ленинград мужийн захирагч Александр Дрозденко бүс нутагт нь гарсан халдлагын улмаас гурван хүн шархадсаныг Телеграм сувгаараа мэдээлсэн байна.
Сошиал сүлжээнд тарсан зураг, бичлэгүүдэд Баасан гарагийн өглөө Санкт Петербургийн тэнгэрт хоёр хэсэг өтгөн хар утаа тарж байгааг харуулжээ.
NASA эдгээр утаа хиймэл дагуулаас бас харагдаж байгааг мэдээлсэн байна.
Эх сурвалжийн мэдээлснээр хотын төвөөс өмнө зүгт 15 км зайд оршдог Шушары дүүргийн Wildberries компанийн ложистикийн байгууламжаас нэг утаа нь гарч байжээ. Нөгөө утаа нь Санкт Петербургийн зүүн өмнөд хэсэгт оршдог Уткина үйлдвэрийн агуулахаас гарсан байна.
Компаниас гаргасан мэдэгдэлд Санкт Петербург хот болон Ленинград муж дахь ложистикийн хоёр байгууламжийн үйл ажиллагаа зогссоныг дурджээ.
Мөн Крым дэх байгууламжаас ажилчдыг нүүлгэн шилжүүлснийг мэдээлсэн байна.
Үүнээс гадна Баасан гарагт Москва хотоос зүүн хойд зүгт оршдог Киров мужийн аж үйлдвэрийн байгууламж Украины халдлагад өртөхөд зургаан хүн амиа алдаж, 20 гаруй хүн шархадсан талаар орон нутгийн эрх баригчид мэдээлжээ.
Баасан гарагийн орой Украины ерөнхийлөгч Володимир Зеленский зэвсэгт хүчин нь Wildberries компанийн байгууламжууд, Киров мужийн аж үйлдвэрт довтолсныг хүлээн зөвшөөрч, тэдгээрийг Оросын армид пуужин, нисгэгчгүй онгоцны эд анги нийлүүлдэг байсныг тайлбарласан юм.
“Эзлэн түрэмгийлэгч армид нисгэгчгүй онгоцны эд анги, навигацын тоног төхөөрөмж, цэргийн хэрэгсэл нийлүүлдэг Оросын ложистикийн байгууламжуудын эсрэг ажиллагаа үргэлжилж байна” гэж тэр сошиал хуудсандаа бичжээ.
Баасан гарагаас өмнө хэдхэн хоногийн дотор Wildberries компанийн нийт ложистикийн багтаамжийн 10 орчим хувийг бүрдүүлдэг таван байгууламж Украины агаарын цохилтод өртөөд байсан юм.
Wildberries болон түүний жижиг өрсөлдөгч Ozon компаниуд Оросын дотоодын нийт бүтээгдэхүүний 8.5 хувьтай тэнцэх хэмжээний бараа, үйлчилгээ борлуулж, дөрвөн сая орчим хүнийг ажиллуулдаг нь тус улсын нийт ажиллах хүчний 5 илүү хувийг бүрдүүлдэг байна.
Эх сурвалж: AFP
